CAGAYAN DE ORO CITY-Kasuhan sa PDEA-10 sa paghupot sa gidiling droga ang re-elected punong barangay nga nasikop sa Poblacion,Lagonglong,Misamis Oriental.
Kini human unang nakuhaan sa 20 gramos nga giingong shabu si Banglay Brgy Kapitan Honiforte Redondo,33 anyos,minyo ug nagpuyo sa maong lungsod sa operasyon sa PDEA.
Miingon si PDEA agent Ben Calibre nga isang-at nila ang pagsupak sa Dangerous Drugs Act of 2002 sa provincial prosecutor’s office ning syudad ugmang adlawa.
Si Redondo ang gikonsiderar nga high value target diin anaa sa listahan ni Pres Rodrigo Duterte.
Samtang giakusahan ni Punong Brgy Honiforte Redondo nga planted evidence ang nakuha nga 20 gramos nga shabu sulod sa iyang pinuy-anan sa Poblacion,Lagonglong,Misamis Oriental.
Kini human namugos si Redondo nga wala’y gidala niya nga shabu sulod sa kuwarto sa iyang anak sukwahi sa gipatoo sa taga-PDEA -10.
Miingon si Redondo nga limpyo ang iyang konsenya nga wala nagsumikad
kaniya ang 12 ka sachets sa gitoohang shabu nga nakuha sa PDEA sa ilang pinuy-anan sa miaging Biyernes sa hapon.
