CAGAYAN DE ORO CITY-Abre si City Police Director Sr/Supt. Nelson Aganon sa laraw ni Ozamiz City Police Office commander C/Insp Jovie Espenido nga magpa-assign sa Cagayan de Oro City Police o COCPO.
Kini sa tumong nga siya ang mangunay paglakag sa narco-politicians sa syudad.
Matud ni Aganon nga walay problema kaniya kon hulipan siya ni Espenido ilabina kung mao kini ang mando ni PNP chief Dir Gen Oscar Albayalde.
Gitin-aw usab niini nga dili insulto kaniya ang pahayag ni Espenido ilabina nga susama sila’g kampanya batok sa illegal nga droga.
Samtang gipamugos ni Aganon nga wala siya magpasagad sa paglakag sa high-value target nga nalambigit sa ilegal nga droga sa tibook syudad.
Siya miingon nga kanunay adunay accomplishment ang matag police station sa pagpangdakop sa mga high-value target.
Gani, kanunay silang nakigkoordinar sa Philippine Drug Enforcement Agency sa paglakag sa mga high-value target sa drugs.
Una niini, matag semana gapangayoan ni Aganon og accomplishment sa drugs ang matag police station sa syudad.
