CAGAYAN DE ORO CITY-Naglaum ang Pinay OFW sa Singapore nga magmalampuson ang summit nila ni US Pres Donald Trump ug North Korean lider Kim Jong-Un ugmang adlawa.
Sa ekslusibong pakighinabi sa Bombo Radyo kang Zeny Leong, gibutyag niini nga makabenepisyo ang tibook kalibutan kung magkasinabot ang duha ka mga gamhanang nasud.
Gani, naglaum usab si Leong nga human ang summit ni Trump ug Kim, bisitahon usab sa lider sa komunistang nasud ang Pilipinas ug makigkita kang Pres Rodrigo Duterte.
Dugtong pa ni Leong nga perfect venue ang Capella Hotel sa panagtagbo sa duha ka mga dagkong lider.
Siya miingon nga ang Capella Hotel mao ang pinakamahal nga hotel sa Singapore ug mao kini ang puy-anan sa mga tag-as nga opisyal nga bisita sa maong nasud.
Hisayran nga ang maong hotel ang nahimutang sa Sentosa Island, Singapore kun diin nagbaton kini’g 112 ka mga manors, suites ug guestrooms nga gi-disenyo ni Lord Norman Foster.
