CAGAYAN DE ORO CITY-Gi-indorso na ni City Mayor Oscar Moreno nga si incumbent Brgy 40 Kapitan Alam Lim ang opisyal nila nga kandidato pagka-presidente sa election sa Association of the Brgy Captains o ABC sa Hulyo ning tuiga.
Gihimo ni Moreno ang kumpirmasyon nunot sa pagbiya na ni Lim sa partido Padayon Pilipino nga gipanguluhan ni kanhi City Mayor Vicente Dongkoy Emano.
Gi-depensa usab ni Moreno ang pagbiya ni Lim kang Emano diin kini namugos nga nangita lama’g kagawasan ang pipila ka kapitan nga giingong gi-dominar niini sa syudad.
Si Lim ang kasamtangang ABC president nga nag-representar sa kapitanes sa syudad diha sa city council.
Samtang gusto ni Lim nga gamiton ang access direkta kang Pres Rodrigo Duterte aron daghang serbisyo ang matunol sa kabarangayan ning syudad.
Kini ang kabahin sa gitumbok nga rason ni Lim kon nganong gisalikway niya si Emano ug nagpasakop na sa grupo ni Moreno.
Miingon si Lim nga daw pagsugal sa iyang kinabuhi ang gihimo niini aron lamang makadugang pa’g serbisyo sa katawhan sa kabarangayan sa syudad.
