CAGAYAN DE ORO CITY-Pagkabilanggo sa tibuok kinabuhi silot sa korte batok kang Australian national Peter Gerard Scully ug Pinay live-in partner Carme Ann Alvarez ning syudad.
Kini human sila hukmi ni RTC Branch 37 Judge Jose Escobido nga guilty sa kasong qualified human trafficking ug lima ka counts sa rape by sexual assault kagahapon sa hapon.
Miingon si Regional State Prosecutor Merlynn Uy nga dakong kadaugan sa hustisya ang pagka-konbikto ni Scully ug Alvarez kinsa nalambigit sa international pedophile syndicate.
Si Scully ang wanted sa 22 ka kanasuran hinungdan nagtagu-tago sa Pilipinas ug nasikop sa NBI-10 sa Malaybalay City,Bukidnon niadtong Pebrero 22,2015.
Samtang gikalipay sa daghang grupo nga nag-adbokasiya sa protection sa katungod sa kababayen-an ug kabataan nga gihukman nga guilty si Scully ug Alvarez.
Miingon si Atty Perfecto Mendoza,legal counsel sa Balaod Mindanao nga nagpakita lamang kini nga nagligid pa gihapon ang hustisya alang sa mga biktima sa pagpangabuso sa nasud.
Dugang ni Mendoza nga gawas sa 6 counts criminal convictions ni Scully ug Alvarez,laing 69 pa ka kaso nga gilambigitan sa duruha ang padayong dunggon sa tulo ka magkalahing korte sa syudad.
Si Scully ug Alvarez ang gi-reklamo sa walo ka menor de edad kay gigamit sila sa international pedophile syndicate niini.
