CAGAYAN DE ORO CITY-Gisuta sa Task Force Bangon Marawi ang kamatayon sa mga isda nga nanglutaw sa Lake Lanao sa Lanao del Sur.
Kini human nabalaka ang mga residente gikan sa 11 ka lungsod kon unsa’y dangatan sa ilang panglawas kon sila mokaon sa maong mga isda.
Miingon si Task Force Bangon Marawi Assisstant Secretary Felix Castro nga dili pa nila makompirmar kon epekto sa mga bomba nga gihulog sa militar batok grupong Maute-ISIS kaniadto ang natigayon sa fish kill.
Una niini, nagduda ang mga residente nga nahilo ang mga isda sa pulbora mga bomba samtang dunay nagtoo nga epekto usab kini sa aktibong bulkan nga anaa ilawom sa Lake Lanao.
Apektado sa fish kill ang Marantao; Tamparan; Poona Bayabao; Ramain; Ganassi; Masiu; Balindong; Bacolod-Kalawi; Lumbayanague; Bayang-Lumbatan ug Taraka sa maong lugar.
