CAGAYAN DE ORO CITY-Susihon pa sa Cagayan de Oro City Police Office o COCPO ang ordinansa sa lokal nga kagamhanan batok sa mga tambay sa syudad.
Matud ni COCPO spokesperson Supt Mardi Hortillosa nga dili pa sila mohimo’g pagpangdakop sa syudad hangtud dili pa nila mabasa ang unod sa ordinansa aron wala silay masupak nga katungod sa mga residente.
Sya miingon nga dili nila dakpon ang mga tambay kung walay nahimong kasupakan sa balaod.
Gitin-aw ni Hortillosa nga dili nila dakpon ang mga mag-inom gawas sa mga balay-patigayon.
Sumala pa ni Hortillosa nga ila lang kapkapan ang mga mag-inom sa pagseguro nga wala sila’y dalang mga armas o mga mahait nga hinagiban.
Gibutyag niini nga supak sa balaod ang pag-aresto sa usa ka yanong residente nga igo lang naglingaw-lingaw ug walay gihimong krimen.
