CAGAYAN DE ORO CITY-Gipanganti ni City Police Director Sr/Supt Nelson Aganon nga kasuhan ang kapin 50 ka tambay nga ilang nadakpan sa gilusad nga anti-tambay drive sa syudad.
Si Aganon miingon nga sagad sa ilang nadakpan kadtong mga nag-inom daplin sa dalan nga nakasupak sa city ordinance.
Una nang nagpahimangno ang mga pulis nga pagkapriso nga dili mulapas sa upat sa bulan ug multa sugod P500 pataas ang atubangon sa mga estambay nga anaa sa kadalanan sa syudad bisan dis oras na sa gabii.
Samtang nagbahad si City administrator Teddy Sabugaa nga ilang silotan ang mga ginikanan sa mga menor de edad nga madakpan sa himoong anti-tambay drive sa kapolisan dinhi syudad.
Matud ni Sabugaa nga kinahanglang manubag ang mga ginikanan tungod sa ilang gihimong pagpasagad sa ilang mga anak.
Asoy niini nga adunay sila’y team nga gitukod aron maoy mag-areglar sa mga menor de edad nga madakpan sa mga pulis.
Gitin-aw usab ni Sabugaa nga ilang ipaubos sa “After Care program” ang mga ginikanan sa mga batan-on nga ipaubos sa rehabilitasyon.
Sumala ni Sabugaa nga kinahanglan usab nga e-orient ang mga ginikanan aron masayod sila sa ilang buhaton sa panahon nga makaggawas na sa rehabilitation center ang ilang mga anak.
Una nang gibutyag ni Sabugaa nga ilang dalhon sa rehabilitation center ang mga menor de edad nga ma-rescue nga dugay ma-locate ang ilang mga anak.
