CAGAYAN DE ORO CITY-Misaka na sa 619 ka estambay ang nasikop sa kapolisan sa Northern Mindanao.
Sumala ni PNP regional spokesperson Supt Surki Sereñas nga naggikan ang maong ihap sa nagkadaiyang munisipalidad sa tibook rehiyon.
Gitin-aw ni Sereñas nga hugot ang direktiba ni PNP regional director C/Supt Timoteo Pacleb nga sitahon una ang mga tambay ayha arestohon kung pabiling magmagahi.
Samtang mireklamo ang pipila ka dinakpan tungod kay wala sila masayod nga gipatuman na ang mga ordinansa nga naghatag pagtugog nga dakpon ang mga estambay sa syudad.
Sa gihimong full-blast operation sa nagkadaiyang dapit sa rehiyon, moabot na sa kapin 600 ang nadakpan tungod sa Oplan Estambay nga gilusad sa mga pulis.
Matud ni Sereñas nga dili na angayan nga tagsa-tagsaon pa sila sa pagpahibalo gumikan kay hugtanon kining gipahibalo ni Pres Rodrigo Duterte.
Gipasalig ni Serenas nga dili makasupak sa human rights ang ilang pagpatuman sa maong balaod.
