CAGAYAN DE ORO CITY-Gibasura ang kasong kriminal nga gipasaka sa Ombudsman batok kang City Mayor Oscar Moreno ug pipila ka department heads didto sa Sandigabayan 1st Disvision.
Kini human pabori sa mga mahistrado ang petition sa kampo ni Moreno nga daw napihig siya alang unta sa speedy trial nga gihimo sa Ombudsman sukad napasaka ang kaso sa tuig 2007.
Miingon ang chief legal counsel ni Moreno nga si Atty Dale Brian Mordeno nga mibati sila’g gamay’ng kalipay kay nagbunga’g maayo ang ilang gipakig-bisugan.
Hinoon, dili pa hingpit makaginhawa si Moreno kay may laing 23 ka kasong kriminal pa sa Sandiganbayan ang dunggon sa mga mahistrado.
Nagsumikad ang kasong kriminal tungod sa mga gisudlang transaksyon ni Moreno samtang nagsilbi pa nga gobernador sa tulo ka termino sa Misamis Oriental.
Samatang dili apektado ang testigo sa kasong kriminal nga gipasaka sa Ombudsman batok sa grupo ni Moreno.
Miingon si Engr Antonio Nuniez nga gitahod nila ang hukom sa mga mahistrado sa pagbasura sa kasong kriminal sa maong dibisyon.
Apan kumpiyansa si Nuniez nga dili managsama’g huna-huna ang mga mahistrado nga naghawid sa mga kasong kriminal batok kang Moreno.
Si Moreno ang gitangtang sa daghang higayon sa Ombudsman tungod sa govt transactions nga wala miagi’g public bidding apan gipugngan usab kini sa Court of Appeals-Mindanao.
