CAGAYAN DE ORO CITY-Ipatuman ang balaod pinaagi sa mando sa korte sa pagpabalhin sa 220 ka pamilya nga ilegal nag-okupar sa 2.7 ektaryang yuta sa usa ka developer sa Purok 12,Sitio Baloy,Brgy Tablon ning syudad.
Kini ang pahayag ni City Mayor Oscar Moreno sa pagpa-demolish sa apektadong pamilya subay sa mando sa korte sa maong lugar kagahapon sa buntag.
Miingon si Moreno nga dili sulbad ang kanunay nga paghangyo sa mga politiko apan ang lahutay nga paghatag ug yuta nga mapuy-an sa maong apektadong residente.
Kini ang hinungdan nga gi-trabaho ni Moreno sa iyang dept heads ang pagpahimutang sa mga apektadong pamilya sa usa sa mga relocation site ning syudad.
Samtang andam makig-kamatay ang legal counsel sa 220 ka pamilya kon gihinayon pa ang pag-demolish sa ilang kabalayan subay sa mando sa korte.
Miingon si Atty Dale Brian Mordeno nga wala nila supaka ang mando ni MTCC Branch 2 Presiding Judge Elueteria Badoles Agdolon apan nangayo lamang sila sa gamay’ng pagsabot alang sa apektadong mga pamilya.
Kini ang hinungdan nga mag-atubang sila si Morderno ug Atty Leny Go sa legal claimant sa yuta sa sala ni Agdolon aron ituki ang motion in hold abeyance sa pagpa-domolish sa kabalayan nga nagtindog sa maong lugar.
Samtang paminawon sa kompanyang Hemare Development Corporation ang pagtuki sa korte sa mosyon sa 220 ka pamilya.
Kini human uyuni sa korte ang hangyo ni Mordeno nga ma-oktaba una ang pag-demolish sa kabalayan sa maong mga pamilya.
Miingon ang abogado sa kompanya nga si Atty Leny Go nga dili na sila mabasol sa mga residente kay daghang offer na ang nahatag nila apan kanunay nga balibaran.
Gani,mismo pa ang kompanya ang mopalit sa laing luna sa yuta aron lamang kabalhinan sa apektadong pamilya apan igo lamang kining giyam-iran.
