CAGAYAN DE ORO CITY- Balik na sa normal ang sitwasyon sa 44 gikan sa 45 ka pamilya nga apektado sa paghapak sa storm surge epekto sa hanging habagat sa lungsod sa Initao ug Jasaan,Misamis Oriental.
Kini human naguba ang pinuy-anan ni Michael Llana dihang sentro sa paghapak sa dagkong balod ang balay niini sa Purok 1,Poblacion,Initao.
Miingon si Misamis Oriental PDRRMO head Fernando Dy Jr nga gawas niini,nasudlan usab sa tubig-dagat ang 20 ka balay sa Barangay Bobuntugan ug 24 sa Initao apan walay natala nga tawo nga naangol.
Mitala usab sa landslide sa Brgy Sta Ana,Tagoloan apan walay apektadong mga residente niini kagahapon sa buntag.
Dugtong niini,giklaro ni Dy nga balik na sa normal ang klase sa 11 ka lungsod nga nag-suspenso kagahapong adlawa.
Samtang mitala usab sa zero casualty bisan nga subli gibaha gumikan sa pag-ulan ug pipila ka pagdahili sa yuta ang syudad.
Miingon si CDRRMD head Allan Porcadilla nga bugtong ang pamilyang Ubalde lamang sa Purok 5,Upper Kolambog,Brgy Lapasan ang apektado sa dautang panahon.
Mobalik na usab ang klase sa dul-ag 20 ka publiko ug pribadong tunghaan nga nagkanselar sa ilang mga klase kagahapong adlawa.
Una usab niini,gikompirmar ni CDRRMD operations chief Engr Cindy Sabanal nga dili na angay kabalak-an ang panahon apan likayan ang mag-kumpiyansa ilabina nga duha ka landslide ang natala sa syudad kagahapong adlawa.
