CAGAYAN DE ORO CITY – Swerteng wala maigo sa pagpamusil sa tulo ka suspek ang brgy kapitan sa Mailag, Valencia City Bukidnon. Tulo kahigayon nga gipusil sa mga suspek ang target nga si John Louie Naiz apan napakyas sila.
Matud ni Valencia City Police Director Supt Ritchie Yandug nga nabantayan ni Naiz ang riding in-trio nga gasunod-sunod kaniya samtang sakay sa iyang multicab pauli gikan sa iyang trabaho.
Kalit mihunong ang kapitan ug gisulayan siya’g pusil sa usa sa mga suspek gamit ang .45 caliber pistol apan wala kini miboto. Misunod kaniya pagpusil ang ikaduhang suspek apan wala gihapon kini miboto.
Pag-abot sa ikatulo nga suspek, miboto na ang armas apan nakadagan na ang biktima ug nakatago sulod sa usa ka residential house. Narekober sa crime scene ang usa ka empty shell sa .45 caliber pistol.
