CAGAYAN DE ORO CITY-Mihangyo sa korte ang kampo ni architect Rey Galua, ang gitudlong person of interest sa pagpatay sa university president nga si Dr. Ricardo Rotoras nga maka-piyansa sa kasong illegal possession of firearms ug explosives charges.
Matud ni Atty Art Ubaub, nga miduso sila’g petition for bail sa Regional Trial Court Branch 24 tungod kay nagreklamo na ang iyang kliyente sa walay kalambuan nga imbestigasyon sa kaso sa kapulisan.
Masaligon si Atty Ubaub nga ihatag sa korte ang petition for bail ilabina nga huyang ang kaso ug adunay sayop sa operasyon nga gihimo sa Criminal Investigation and Detection Group (CIDG).
Una nang gibutyag ni SITG-Rotoras spokesperson Supt Mardi Hortillossa nga ila nang gisalig sa korte kon dapigan ang hangyo sa kampo ni Galua.
Samtang gidawat sa SITG-Rotoras ang hagit ni Eldie Rotoras, igsoon sa gipatay’ng USTP Pres nga ipaubos sa lie-detector test ang byuda niini.
Kini sa tumong nga mahibal-an kung may kalambigitan kini sa kamatayon sa iyang igsoon.
Sumala pa ni Hortillossa nga kasamtangan nilang gi-negotiate si Zarah Lyn Rotoras nga ipaubos sa lie-detector test ilabina nga nagboluntaryo ang pamilyang Rotoras nga mopaubos niini.
Una nang gikonsiderar sa magsoong Rotoras nga person of interest o POI ang kapikas niini sa kamatayon ni USTP president Dr Rotoras tungod sa ilang mga talagsaong obserbasyon.
