CAGAYAN DE ORO CITY-Gimando ni PNP regional director C/Supt Timoteo Pacleb ang pagpahugot pa sa ipatuman nga seguridad sa tanang pampublikong lugar sa Amihang Mindanao.
Kini epekto sa natigayong suicide car bombing diin 11 ka tawo ang namatay nga gilakipan sa sundalo,Cafgu members ug mga sibilyan sa Brgy Colonia,Lamitan City,Basilan kagahapong adlawa.
Miingon si PNP regional spokesperson Supt Surki Serenias nga dili lamang angay mataranta ang publiko apan igmat sa palibot bisan distansiya ra sa rehiyon ang suicide car bombing sa Basilan.
Samtang gi-doble pa sa kapolisan ug militar ang paghimo sa road checkpoints sa nagkadaiyang bahin sa entrance ug exit area nga pasulod sa dakbayan.
Kini aron pugngan ang posibleng pagsabwag kagubot sama sa natigayon sa car suicide bombing sa military checkpoint nga dunay namatay ang 11 ka tawo.
Miingon si Task Force Oro head Army Maj Anshary Pambuya nga nangayo sila sa tabang sa publiko aron masiguro nga masumpo ang himoong divertionary tactics sa mga terorista bisan ubos sa martial law ang Mindanao.
