CAGAYAN DE ORO CITY – Kuhaon na sa South Korea ang kapi’g 5-mil ka tonelada nga basura nga unang gipalusot sa Verde Soko Philippines Incorporated diha sa Brgy Sta Cruz,Tagoloan,Misamis Oriental.
Kini human subli makigtagbo ang walo ka South Korean officials sa Bureau of Customs o BoC aron sabutan ang paagi nga mapadali ang pagkuha sa maong mga basura nga gipalusot sa Verde Soko nga walay pagtugot sa balaod sa nasud.
Miingon si Mindanao Container Terminal o MCT collector John Simon nga mahidangat ang South Korean environment officials sa Pilipinas sa Hunyo 12 ning tuiga alang sa maong katuyuan.
Samtang suportado ug gikalipay sa grupong EcoWaste Coalition ang pagpasar ni Misamis Oriental 2nd District Rep Juliette Uy sa House Bill 9207 sa kamarabaha ning semanaha.
Kini human gitinguha ni Uy nga hingpit nang idili ang pagpasulod sa mga basura gikan sa ubang kanasuran dinhi sa Pilipinas.
Miingon si EcoWaste Coalition national coordinator Aileen Lucero nga dako’g tabang ang maong balaodnon aron dili na masubli ang pagpasulod sa imported garbage sa Pilipinas ilabina sa Misamis Oriental.
Una niini,gikadismaya pag-ayo sa taga-Mindanao ang tulo ka magkalahi nga shipments sa mga basura gikan sa South Korea,Australia ug Hongkong nga pulos nagdala’g peligro sa panglawas sa katawhan.
