CAGAYAN DE ORO CITY – Mi-surrender ang laing duha ka armadong supporters sa Maute-ISIS group sa militar sa Brgy
Matitikop,Tubaran,Lanao del Sur.
Sumala ni 103rd Infantry Brigade Commander Brig Gen Romeo Brawner Jr nga bitbit sa surrenderees ang duha ka caliber pistol ug mga bala.
Siya miingon nga ang mga surrenderee maoy gahatag suplay sa grupo sa namatay’ng local terrorist group leader nga si Owayda Marohombsar alyas Abu Dar.
Si Abu Dar ug tulo ka kauban niini ang napatay sa militar sa engkwentro sa Brgy Dinaigan,Tubaran, Lanao del Sur. sa miaging mga bulan ning tuiga.
Samtang gikompirmar ni Brawner nga misaka na sa 165 ka supporters sa Maute-ISIS ang boluntaryong mitahan sa militar.
Siya miingon nga nunot kini sa ilang gipatuman nga programa aron mapakigbatukan ang terorismo.
Dugang ni Brawner nga ila usab gimonitor karon ang recruitment sa mga Maute-ISIS ilabina nga daghan na sila’g nasapon nga mihimo sa mga pagpang-recruit.
Una nang gibutyag sa militar nga mihuyang na ang maong grupo human mapatay sa operasyon si Abu Dar.
Nasayran nga si Abu Dar ang usa sa mga mihimo’g pag-atake sa Marawi City diin milungtad sa lima ka bulan ang giyera.
