CAGAYAN DE ORO CITY – Imbestigaran sa Misamis Oriental Sangguniang Panlalawigan ang nasunog nga mga basura sa Verde Soko Philippines sa Sitio Bugwak, Brgy Sta Cruz,Tagoloan ning lalawigan.
Miingon si SP board member Gerardo Sabal III,vice chairman sa environment committee nga tuyo nila sutaon kon aksidente o gituyo ang hitabo.
Kabahin sa pangayua’g katin-awan sa hitabo ang Verde Soko,Bureau of Customs, Phividec, Department of Environment and Natural Resources, Bureau of Fire Protection ug lokal nga kagamhanan sa Tagoloan.
Naglaum si Sabal nga matin-awan ang tanan sa hinungdan sa pagkasunog sa mga basura sa ilang himoon nga imbestigasyon.
Samtang tambungan ni Mindanao Container Terminal o MCT collector John Simon ang ipatawag nga imbestigasyon sa Sangguniang Panlalawigan sa pagkasunog sa mga basura sa Verde Soko diha sa Tagoloan ning lalawigan sunod semana.
Kini human intresado si Simon masayod kon natural o tinuyo ang pagkasunog sa ilang gikustodiya nga mga basura sa maong lugar.
Miingon si Simon nga gusto niini kasuhan kon ugaling may mga tawo nga mihimo’g sabotahe sa mga ebedensiya ilabina nga may kaso nga giatubang ang kadagkuan sa Verde Soko.
Sa miaging bulan,gisulaya’g kawat sa 30 ka basurero ang mga basura apan pulos nadakpan ug nakasuhan.
