CAGAYAN DE ORO CITY – Gikompirmar ni Army Major Regie Go ang pagbisita ni Armed Forces of the Philippines (AFP) Chief of Staff General Benjamin Madrigal Jr., sa Kampo Evangelista, Barangay Patag ning syudad.
Sa interbyu sa Bombo Radyo Cagayan de Oro, miingon si Major Go nga tipik sa iyang pagbisita mao ang book launching sa librong gisulat sa 4ID nga nag-uluhang “Ending Local Communist Armed Conflict (ELCAC): The Community Initiatives and Transformation Program in Northeastern Mindanao”.
Gibutyag ni Go nga daku ang pasalamat ni Gen. Madrigal sa tanan kasundaluan sa 4th Infantry Division tungod sa walay luwas nga kalampusan ilabe na sa pagsanta sa insurhensiya sa Northern Mindanao ug Caraga Region.
Kung mahinumduman, si Madrigal unang misilbi isip, division commander sa 4ID, nga karon, gihuptan ni Major General Franco Nemesio Gacal.
Gitin-aw sa tigpamaba sa 4ID nga mao na kadto ang farewell visit ni Madrigal kay muretiro na kini pag-abot sa bulan sa Setyembre.
