CAGAYAN DE ORO CITY – Gikompirmar ni Lt Col Roy Anthony Derilo, commander sa 58th IB,Philippine Army nga gidis-armahan sa kapin kon kulang 15 ka sakop sa rebeldeng New Peoples Army ang security guards sa Minergy Power Plant sa Sitio Bawsan, Brgy Quezon, Balingasag, Misamis Oriental kaganihang buntag.
Base sa report, lima ka armas ang nakuha sa rebelde sa mga sekyu sa planta.
Gihimakak ni Derilo ang report nga nangatake sulod sa planta ang NPA tungod kay igo ra nanguha’g armas ang nasampit nga grupo.
Nagtoo ang militar nga gi-atake sa mga rebelde ang Minergy kay napakyas kini sa ilang gipangayo nga revolutionary tax.
Samtang gipamugos ni Ka Nikolas Marino, nagpailang tigpamaba sa NPA-Misamis Oriental Command nga dili revolutionary tax ang ilang tumong sa pag-atake Minergy Coal Power plant ug sa pagharas sa mga sekyu sa kompanya ganinang buntag.
Gibulgar ni Marino nga kapin libo na ang ihap sa mga residente ang naglagot sa kompanya tungod sa dautang epekto sa polusyon sa coal sa kina-iyahan ug panglawas sa tawo.
Namugos si Marino nga miabot sa 10 minutos ang ilang pagdis-arma sa mga sekyu sa planta ug mibahad nga sundan ang pag-atake kung dili nila matabangan ang mga nagsakit sa asthma, pulmonya tungod sa polusyon sa hangin ug tubig nga gibuga sa coal powered plant.
