CAGAYAN DE ORO CITY – Patay ang usa ka lending worker dihang nalambigit sa pagka-disgrasya sa gisakyang motorsiklo sa Purok 3,Barangay San Juan,Gingoog City,Misamis Oriental.
Giila ni Gingoog City Police Station commander Lt Col Ariel Pontillas ang namatay nga si Mark June Amba,hingkod ang panuigon nga nagpuyo sa Brgy Sapong,Lagonglong ning lalawigan.
Miingon si Pontillas nga padulong sa Gingoog City direction ang biktima dihang kalit mihimo’g pag-overtake mismo sa yellow line hinungdan sa pagkabangga-i niini sa laing naka-motorsiklo nga gisakyan sa police officer.
Dugang sa opisyal nga padulong mag-duty si Police Master Sgt Arvy Balatero sa Medina Police Station dihang nagkabangga sila sa biktima.
Nadamyos ang ulo sa biktima hinungdan sa hinanali niining kamatayon kagahapong adlawa.
Gidala usab sa Northern Mindanao Medical Center si Balatero tungod sa naangkon niini nga mga samad sa kalawasan.
Giimbestigaran pa gihapon sa mga otoridad ang maong hitabo kagahapong adlawa.
