CAGAYAN DE ORO CITY – Giangkon ni Police Regional Office o PRO-10 spokesperson Lt. Col. Mardi Hortillosa nga apektado na ang security measures sa kapolisan batok sa mga terorista kon walaon ang martial law sa tibook Mindanao.
Gibutyag ni Hortillosa nga daghang adjustments ang ilang himoon ug wala na sila’y gahom nga ma-hold ang mga kadudahan nga tawo.
Apan gitin-aw ni Hortillosa nga andam sila nga tumanon ang hukom sa ilang kadagkuan kalabot na sa batas-militar.
Samtang gipasalig sa AFP Western Mindanao Command o Westmincom nga magpabiling lig-on ang relasyon sa militar tali na sa local government units.
Kini bisan mahukman sa Department of National Defense nga wagtangon na ang martial law sa Mindanao.
Gibutyag ni AFP Westmincom spokesperson Army Major Arvin Encinas nga nakakuha na sila’g maayo nga relasyon sa komunidad diin dako’g natabang sa kampaniya batok sa mga terorista ug walhong grupo.
Una nang gibutyag ni Encinas nga subject for assessment pa ang wagtang sa batas-miliar sa Mindanao.
