CAGAYAN DE ORO CITY – Giangkon sa Police Regional Office-10 nga nabalaka sila sa subli paglihok sa mga kontra sa gobierno aron tugawon ang kahusay ug kalinaw sa Mindanao.
Gihimo ni PRO-10 spokesperson Lt Col Mardi Hortillosa ang pahayag tungod sa rekomendasyon ni Defense Sec Delfin Lorenzana nga dili na lugwayan ang Martial Law sa rehiyon.
Apan gipasalig sa PRO-10 nga magpabiling alerto sila kuyog nag militar batok sa bisan unsa nga hadla sa seguridad dinhi sa Mindanao.
Samtang gitawag sa AFP Western Mindanao Command o Westmincom nga dakong hagit ang rekomendasyon ni Defense Sec Delfin Lorenzana nga wagtangon na ang martial law sa Mindanao.
Miingon si AFP Westmincom spokesperson Maj Arvin Encinas nga napalibutan sa mga terorista sama sa grupo sa Abu Sayyaf, NPA, BIFF ug Maute-ISIS ang ilang area of responsibility.
Apan gibutyag niini nga ilang ikapasalig nga masiguro ang seguridad sa katawhan sa ilang lugar tungod sa suporta nga gihatag kanila sa lokal nga kagamhanan.
