CAGAYAN DE ORO CITY – Gitahas ni Police Regional Office 10 regional director Brig Gen Rolando Anduyan nga imbestigaran ang kamatayon sa upat sa lima ka suspected members sa Perez Robbery Organized Syndicate nga unang gika-engkuwentro sa kapolisan sa Libertad,Misamis Oriental.
Kini human napatay sila si Jephone Fabriga Tinamisan,Richardson Perez,Mickey Abellana ug alyas Bulaw sa magkalahi nga higayon sa police operations sa maong lungsod.
Miingon si Anduyan nga tuyo niini masayran gikan sa Regional Internal Affairs Service o RIAS-10 kon wala mag-abusar ang iyang mga pulis nga migukod sa maong mga suspek nga nakig-pinusilay diin napatay usab si Police Senior Master Sargeant Ronald Caayupan sa miaging Lunes sa gabii.
Si Tinamisan ang unang napatay human niya pusila si Caayupan sa checkpoint area samtang napatay usab sila si Perez,Abellana ug alyas Bulaw kay giingong nanukol sa mga otoridad.
