(Update) CAGAYAN DE ORO CITY – Ipasaka sa kapolisan karong adlawa sa pisklaya ang kasong ‘adultery’ batok sa lalaki nga public school principal ug gitoohang ka-relasyon niini nga maestra nga unang nadakpan samtang nag-check-in sa Hightime Lodging House sa Brgy Kauswagan ning syudad.
Unang giila sa imbestigasyon sa kapolisan ang reklamante nga si Philippine Army member Alcher Fajardo,34 anyos,minyo ug nagpuyo sa Inpantao,Brgy Iponan ning syudad.
Miingon si Carmen Police Station deputy commander Lt Lorenzo Ocon nga unang nangayo’g tabang ang biktima human makompirmar nga dungan misulod sa room 120 ang iyang asawa nga si Rachel Ann Fajardo,36 ,magtutudlo sa Camaman-an National High School ug si Jufel Gutang,40,taga-Brgy Macasandig ug prinsipal sa Macasandig National High School ning syudad.
Una nang gitinguha sa Bombo Radyo nga makuhaan sa panig ang mga dinakpan apan kusganon sila namalibad ug mihangyo nga hatagan sa pribasiya ang ilang gidangatan.
Hisayrang gibutyag usab ni Ocon sa interbyu sa Bombo Radyo nga giangkon sa maestra nga nakahimo kini’g kasaypanan ngadto sa iyang bana.
