CAGAYAN DE ORO CITY – Ipatawag sa laing higayon sa konseho ang kadagkuan sa Cagayan de Oro Water District o COWD sa sunod nga katiguman sa mga konsehal ug bise-mayor sa dakbayan.
Kini aron subli epa-esplikar sa balik-balik na nga isyu nga inotil nga suplay sa tubig sa pipila ka subdivisions sa syudad.
Nagsumikad ang maong lakang nunot sa special report ni Konsehal Roger Abaday kabahin sa reklamo sa mga residente sa Brgy Iponan diin sila naghasol pag-ayo gumikan sa abnormal nga suplay sa tubig.
Kini ang hinungdang nga gitahas ni City Vice Mayor Jocelyn ‘Bebot’ Rodriguez nga e-eskedyul sa komitiba sa public utility sa konseho ang pagpatawag sa COWD officials ug mismong mga reklamante aron mahatagan sa sulbad ang maong suliran.
Samtang tuyo usab ipaapil ni Konsehal James Judith pagpatawag sa konseho ang kadagkuan sa South Balibago Resources Incorporated nga unang ngpasalig nga masuplayan na sa bastanteng tubig ang pipila ka brgy sa unang distrito sa syudad.
Kini human kabahin si Judith nga mipanday sa memorandum of agreement nga gisudlan sa city govt,COWD ug maong kompanya aron suplayan sa 10 million liters water per day ang nahisgutang bahin sa dakbayan.
Siya miingon nga gusto niini masuta kon nagsulti ba sa tinood ang maong kompanya sanglit nalugwa sa report nga humana ang water treatment facility alang sa maong katuyuan.
