CAGAYAN DE ORO CITY – Gusto sa konseho nga mahukasan sa maskara kon kinsa kining pipila ka empleyado sa city hall nga nalambigit sa lapad nga anomaliya sa city social housing program nga gidumala sa City Housing And Urban Development Department o CHUDD.
Kini human nadiskobre mismo ni City Mayor Rolando ‘Klarex’ Uy nga dunay pipila ka empleyado sa maong buhatan nga gamani-obra sa proseso rason nga dili mahatagan sa housing units kadtong mga tinud-anay nga benepesaryo sama sa mga pamilya nga biktima sa bagyong Sendong sa syudad sa tuig 2011.
Kini ang rason nga gisugyot ni committee on blue ribbon and ethics committee vice chairman Kag. Jose Pepe Abbu Jr nga imbentaryuhon ang mga natukod nga balay sa maong programa ug sayron kon kinsa ang tinud-anay nga okupante o nagpuyo niini.
Una usab niini,gusto ni committee on urban and rural and poor housing devt chairman Kag. Edgar Cabanlas nga mohimo’g kaugalingong imbestigasyon ang konseho.
Kini aron mapalig-on ang ordinansa sa housing program sa dakbayan ug kalikayan nga mismo ang pipila ka taga-city hall ang mo-negosyo niini ngadto sa mga benepesaryo.
