CAGAYAN DE ORO CITY – Magsilbi nang complainant si Kag. James Judith kabahin sa mga kasong ipasaka batok sa mga personalidad nga giingong nagpasagad nga wala mahatagi ang daghang ihap sa mga residente sa special ayuda samtang gipaubos sa enhanced community quarantine ang dakbayan sa tuig 2021.
Kini ang gikompirmar ni Judith kabahin sa iyang findings sa re-investigation sa maong kaso.
Miingon si Judith nga duha ka abogado ang mi-buluntaryo aron paghikay sa mga kaso nga hayan ipasaka batok sa mga tawo nga nalambigit sa giingong kahiwian.
Una nang namugos nang kampo sa konsehal nga nagka-double-triple entries ang pag-release sa sobra P700 milyones pesos nga special fund rason nga angay manubag ang pipila ka miaging city govt officials sa maong panahon.
Samtang wala kahudliki ni kanhi City Mayor Oscar Moreno ang giingong pagduso’g mga kaso sa kampo ni Judith batok kaniya.
Miingon si Moreno nga katungod ni Judith ang paghimo sa aksyon apan nagtoo kini nga walay unod ang maong findings sa imbestigasyon.
Una niini,gihimakak sa kanhi mayor nga dunay anomaliya sa maong pagpanghatag ayuda sa katawhan sa dakbayan.
