CAGAYAN DE ORO CITY – Dili na kapugngan ang subling paglusad sa citywide road clearing operation sa mga istraktura nga nakahatag kabalda ug kapiot sa mga kadalanan sa kabarangayan sa dakbayan.
Kini human sugdi’g re-survey sa task force demolition ang numbered barangays dinhi sa syudad.
Mihangyo si City Mayor Rolando ‘Klarex’ Uy nga unta sabton sa katawhan nga ila kining gihimo subay sa mando sa DILG order.
Una nang gi-abisuhan ang mga nanimuyo sa task force demolition sa Brgy 17 ug mga silingan pa niini nga kabarangayan kabahin sa kamanduan kagahapong adlawa.
Samtang mihangyo si Brgy 17 Punong Brgy Jerico Goldmar Ebabacol kang Uy nga dili mapasagdan ang maapektuhan niya nga mga residente sa demolasyon sa ilang lugar.
Gihimo sa kapitan ang hangyo dungan sa pagkompirma nga anaa sa 33 ka pamilya ang maigo sa ipatuman nga DILG order.
Siya miingon nga nasubo kini sa dangatan sa iyang mga silingan apan angay usab nila sundon ang kamanduan sa natl govt aron dili sila ang sumbalika’g kaso kay wala mosunod niini.
