CAGAYAN DE ORO CITY – Gikuwestiyon sa amahan nga si Ramil Subteniente kon nganong wala makahimo’g diskarte ang iyang anak nga si Melvin Subteniente aron maluwas unta kini kuyog ang kapikas niini ug tulo ka bata sa pagkasunog sa balay nga ilang gikatulgan sa Osmeña Street,Brgy 34 ning syudad.
Kini ang dakong tanghaga nga padayong naglimin sa huna-huna ni Subteniente sa trahedya nga nahitabo sa ilang pamilya.
Siya miingon nga imposible nga walay makalinggawas sa mga biktima nga unta kaya ra gub-on ang bisan asa nga bahin sa nasunog nga balay.
Gawas kang Melvin,patay usab ang iyang asawa nga si Chariz Viel Cagampang Subteniente,ilang anak nga si Charad Venz Subteniente ug magsoong menor de edad gihapo nga si Shider Jed Cagampang ug Seem Weird Balana kinsa pulos natulog dihang nahitabo ang sunog kagahapon sa hapon.
Samtang gitutukan sa mga imbestigador sa Bureau of Fire Protection o BFP-Cagayan de Oro ang posibleng depektosong linya sa aircon hinungdang natigayon ang sunog sa Osmeña Street,Brgy 34 ning syudad.
Miingon si BFP CdeO operations head Fire Insp Sam Velarde nga subay kini sa teorya nga gilitok sa usa sa mga residente nga tuyo unta sudlon ang balay aron luwason ang lima ka biktima sa maong sunog.
Apan mohimo pa sa dugang pakisusi ang BFP aron sutaon ang pinaka-rason sa pagkasunog sa duha ka andanang balay nga gikamatay sa magtiayong Subteniente kuyog sa ilang anak ug laing duha ka magsoong pag-umangkon nga pulos menor de edad.
Dugtong niini,libre nga cremation ug paghaya alang sa public viewing sulod sa city memorial park chapel ang gitunol sa city hall ngadto sa pamilyang Subteniente ug Cagampang diha sa Bolonseri,Brgy Camaman-an ning syudad.
Kini ang inisyal nga tubag ni City Mayor Rolando Klarex Uy sa emosyonal nga hangyo sa maong mga pamilya nga namatyan sa lima ka sakop tungod sa sunog sa Brgy 34 ning syudad sa miaging adlaw.
Miingon si CLENRO manager Engr Armen Cuenca nga maoy mando sa mayor nga libre ang pagtunol sa maong mga serbisyo ngadto sa labing kabus nga pamilya nga namatyan dinhi sa dakbayan.
