CAGAYAN DE ORO CITY – Dili na kulangon ang kaugalingong suplay sa bugas-humay sa Northern Mindanao sa nabiling mga bulan ning tuiga.
Kini ang gibutyag ni NEDA 10 regional director Myla Faye Aurora Cariño taliwala nga nakasinati sa pagnihit sa suplay hinungdang nagsaka-presyo ang kada-kilo sa bugas sa rehiyon sa miaging Agosto ug kasamtangang bulan ning tuig.
Miingon si Cariño nga mi-ubos ang suplay sa barato nga bugas kay nagsilbi nga planting season sa mga basakan ang bulan sa Abril hangtod Agosto.
Apan siya miingon nga sa nabiling mga bulan ning tuiga,huptan sa rehiyon ang 117 porsiento nga ka abunda sa bugas alang sa mga konsumante niini.
Mipasabot siya nga epekto kini sa 397-mil metriko tonelada nga makuha nga local rice production sa rehiyon diin mo-resulta sa 227-mil metriko tonelada nga konsumuhon sa katawhan gikan sa 258-mil metriko tonelada nga bugas.
Samtang naawad-an na’g paglaum si Citizens Watch for Good Governance 10 convenor Atty.Antonio Soriano nga magbaton pa sa lig-on nga local rice production ang nasud.
Kini tungod sa nagkadako nga populasyon nga mokaon sa bugas-humay gikan sa nagkamay nga mga basakan sa humay palibot sa nasud.
Miingon si Soriano nga importasyon sa bugas ang nakit-an iya nga pinakadali nga tubag aron dili magkagubot ang katawhan epekto unya sa grabeng kagutom.
Nakasaway usab kini kay gipasagdan sa gobierno ang paghatag sa subsidiya sa mga mag-uuma apan abtik nakahatag sa tag- kinse mil pesos nga cash ayuda sa small rice retailers nga naigo sa price ceiling order ni Pres Bongbong Marcos.
Sa pikas bahin,mopadala’g laing mga suhestiyon ang price monitoring team kang Marcos kabahin sa unod sa ceiling order niini sa pinili nga klase sa mga bugas alang sa daghang kabus nga katawhan sa nasud.
Kini human kumbinsido si trade and commerce committee chairman Kag. George Goking nga napadaplin ang mga mag-uuma sa price ceiling order sa presidente kay giuna ang mga negosyante sa bugas nga apektado sa ilang kinitaan.
Miingon si Goking nga andam siya makigtagbo sa mga grupo sa mga mag-uuma kuyog ang ubang ahensiya sa gobierno aron basehan sa ilang ipadala nga komunikasyon kang Marcos tungod sa isyu sa bugas.
Hisayrang anaa pa lang sa 40 ka small retailers ang nahatagan sa rice cash subsidy samtang nakaung-ong na ang brgy ug sk election ban kabahin sa maong lakang.
