(Update) CAGAYAN DE ORO CITY – Gipahugta’g balik ni Provincial Gov. Peter ‘Senior Pedro’ Unabia ang health protocols nga angay sundon sa katawhan sa Misamis Oriental.
Kini human naglugwa sa hangyo-ehekutibo ang gobernador ngadto sa duha ka syudad ug 23 ka munisipyo nga ibalik pagsul-ob sa facemask ug mopatuman sa social distancing ang katawhan aron pugngan ang pagkaylap sa influenza like illness o I.L.I nga grabeng miigo sa daghang ihap sa katawhan sa Northern Mindanao region.
Miingon si Provincial administrator John Venice Ladaga nga nagsumikad ang lakang sa gobernador epekto sa alarma nga nahatag sa upat ka dagkong pribadong tunghaan dinhi sa syudad kay sunod-sunod gipanghilantan ang daghang estudyante ug mga magtutudlo sukad pa sa miaging semana.
Gani,nasampit pa sa usa ka unibersidad nga naniguro sila pag-kontrol sa pagkaylap sa I.L.I kay dili matago nga susama kini’g mga sintomas sa Nipah virus nga mihimo’g outbreak sa kanasuran sa Malaysia,Singapore ug India sa magkalahing tuig.
Samtang una nang naglugwa sa hangyo-ehekutibo si City Mayor Rolando ‘Klarex’ Uy diin naghangyo sa katawhan nga mosul-ob balik sa facemask ug ipatuman ang social distancing tungod sa kaso sa ILI sa dakbayan.
Sa pikas bahin,nakatala na ang City Health Office sa dakbayan sa halos 500 ka residente nga naigo sa flu-like illness sugod Enero hangtod Agosto ning tuiga.
Namahayag si CHO head Dra. Rachel Dilla nga nagpasabot kini nga dili lang sulod ning bulana nagsugod pagtakboy ang hilanat ug ubang sintomas sa ILI sa katawhan nga gikabalak-an sa pipila nga Nipah virus.
Siya miingon nga gihimuan na nila’g imbestigasyon ang upat ka tunghaang-pribado ug gikuha-a’g sampling aron ipadala sa DoH-Manila alang sa kompirmasyon batok sa maong bayrus.
Apan gipasabot niini nga pabiling negatibo sa presensiya sa Nipah virus ang nasud bisan sa outbreaks sa Malaysia ug Singapore sa tuig 1998.
Dugtong usab niini,kasado nang ipatuman sa Cagayan de Oro City Police Office o COCPO ang hangyo-ehekutibo ni Uy nga pagpasul-ob balik sa facemask sa katawhan sa dakbayan.
Kini human apil sa natahasan sa city hall ang COCPO nga masiguro nga masunod sa katawhan ang paglig-o’g balik sa local minimum health standards sa syudad.
Namahayag si COCPO spokesperson Police Lt. Col Evan Viñas nga angayang mokooperar ang katawhan aron walay ma-isyuhan sa ordinance violation receipt o OVR.
Apan gilayon nga giklaro usab ni DoH 10 officer-in-charge Director IV Dra Ellenieta Gamolo nga boluntaryo lang ang pagsul-ob sa facemask sa katawhan ilabina sa mga sirado nga mga lugar.
Kini tungod kay walay kamanduan niini gikan sa central office nga istrikto nga ipatuman ang health protocols sama sa panahon sa pandemya sa COVID-19.
Hinoon,gipasabot ni Gamolo nga daghan ang makuha nga benepisyo sa katawhan kon batasanon niini ang pagsul-ob sa facemask ug pagpatuman sa social distancing.
