CAGAYAN DE ORO CITY – Bug-os na ang hukom sa kompanyang Metro Pacific Waters nga undangon nila ang ilang pagbaligya’g tubig sa Cagayan de Oro Water District o COWD sa sunod bulan ning tuga.
Kini maoy prangka nga pagtug-an ni Metro Pacific Waters Senior Legal Counsel Roberto Rodrigo atol sa imbestigasyon sa committee of the whole sa konseho ning syudad kagahapong adlawa.
Giprangkahan ni Kag. Edgar Cabanlas,chairman sa komitiba kon tinud-on ba sa MetroPac ang pagputol sa Cagayan de Oro Bulk Water Incorporated o COBI sa tubig ug kini ang tubag ni Roberto.
Samtang mihangyo sama sa inahan si City Vice Mayor Jocelyn Rodriguez sa kompanyang MetroPac-COBI sa laing lugway aron makapangita’g paagi ang city govt aron walay putol sa tubig nga mahitabo sa COWD.
Kini bisan kon pursigido na ang maong kompanya nga kutob na lang sa Marso 31 ang ilang pagbaligya’g tubig dinhi sa syudad.
Miingon ang bise-mayor nga motabang sila sa paghangyo aron lang kalikayan ang grabeng kahasol kon idayon ang pagputol sa tubig sa dakbayan.
Sa pikas bahin,gipatug-an usab ni Konsehala Imee Moreno si Metro Pacific Waters Senior Legal Counsel Roberto Rodrigo kon tinood ba nga nagsilbi sila nga ‘bugaw ‘ middleman sa tali sa kompanyang Rio Verde ug COWD aron panapio’g maayo ang katawhan sa dakbayan.
Kini aron maputol ang pasangil nga gipakatag sa kampo ni City Mayor Rolando ‘Klarex’ Uy nga tungod ni kanhi City Mayor Oscar Moreno nakasulod ang MetroPac aron ipasamot ang kahimtang sa COWD.
