CAGAYAN DE ORO CITY – Wala gikahadlok ni City Mayor Rolando ‘Klarex’ Uy ang bahad sa MVP Group of Companies nga wad-an na sa Cagayan de Oro Bulk Water Incorporated o COBI sa water supply ang katawhan sa dakbayan.
Sukwahi kini sa unang pag-imbitar ni Mayor Klarex sa taga-COBI diin mihangyo nga dili una putlan sa kutay sa panubig ang Cagayan de Oro Water District o COWD sa miaging Pebrero ning tuiga.
Dugang niini nga andam na ang syudad pinaagi sa gitukod nga task force water supply and distribution kon moundang na ang COBI.
Una niini,mibati’g kumpiyansa si Mayor Uy kay giingong dunay iyang suod nga higala nga nagpasalig kaniya nga andam motubag sa panubig sa dakbayan kon mawala ang COBI.
Dumduman nga gitubag sa hagit sa konseho ang bahad sa kompanya sa negosyanteng si Manny V. Pangilinan nga Metro Pacific Water nga dunay joint venture sa COWD pag-abot sa isyu sa panubig sa dakbayan.
Kini human unang gikompirmar ni Metro Pacific Waters Senior Legal Counsel Roberto Rodrigo nga ihinayon nila ang pagputol sa suplay sa tubig sa COWD kon dili mabayran ang halos half-billion peso payables sa katapusang adlaw ning bulana.
Namahayag si committee of the whole chairman Kag. Edgar Cabanlas nga wala na’y gibating kahadlok ang katawhan sa upat na ka higayon nga pagbahad sa MVP company nunot sa isyu sa bayronon sa COBI.
