CAGAYAN DE ORO CITY – Dili pa luwas gikan sa pasangil ni kanhi City Mayor Oscar Moreno nga duna gyud kini kalambigitan sa pinirmahay sa kontrata sa panubig tali sa Cagayan de Oro Water District o COWD ug Cagayan de Oro Bulk Water Incorporated o COBI didto sa kauluhan.
Kini human kompirmaha ni COWD General Manager Engr Antonio Young nga dunay duha ka hugna sa pirmahay sa maong transkasyon sa tuig 2017.
Gihimo ni Young ang pahayag nunot sa mikatag nga mga hulagway diin makita si Moreno kuyog ang COWD officials ug kadagkuan sa kompanyang MetroPac.
Una nang giakusar sa mga kritiko ni Moreno nga siya ang nagpasulod sa maong kompanya dinhi sa syudad.
Sa paggisa ni Kag. James Judith kinsa nangulo sa COWD-COBI fact finding team,namahayag si Young nga ensakto ang gisulti ni kanhi general manager Engr Rachel Beja nga dunay pinirmahay sa joint venture agreement mismo sa buhatan Local Water Ulitilies Administration o LWUA sa miaging Agosto 17, 2017 diin dili apil si Moreno o laing taga-city govt sa mopirma.
Apan maoy dili matubag ni Young ang mikatag nga hulagway ni Moreno kuyog sa COWDI-COBI officials.Gikompirmar sa COWD general manager nga lahi usab nga hugna ang bulk water supply agreement signing kay natigayon man kini sa miaging Oktubre 30,2017.
Kini nga petsa ang gidudahan sa kampo ni City Mayor Rolando ‘Klarex’ Uy nga apil si Moreno sa nagpirma sa maong kontrata.
Apan makapila na usab gipasabot ni Moreno nga wala kini sukad nag-apil apil sa negosasyon ug pinirmahay sa kontrata pero hinoon misaksi sa katiguman sa duha ka partido aron daw madani pa ang kompanya ni Manny V. Pangilinan (MVP) nga mobubo’g pamuhunan dinhi sa dakbayan.
Gipasabot sa kanhi mayor nga duna sila’y kalihukan nga gidalikyatan sa kauluhan sa maong tuig rason nga nakahigayon daw kini pagtambong sa simpleng seremonya sa bag-ong panubig sa dakbayan.
