CAGAYAN DE ORO CITY – Pakyas mapamatud-an sa fact finding team sa kasamtangan nga dunay obligasyong-legal si kanhi City Mayor Oscar Moreno sa gi-kuwestiyon sa city govt nga kontrata sa panubig tali sa Cagayan de Oro Water District ug Cagayan de Oro Bulk Water Incorporated o COWD-COBI.
Kini human gitapos na sa maong team ang ilang imbestigasyon nga walay nakuha nga direktang impormasyon o ebedensiya gikan sa daghang resource persons nag-apil apil si Moreno aron makasulod kompanyang Metro Pacific Waters dinhi sa syudad.
Namahayag si Ronnie Waniwan,vice chairman sa task force fact finding sub-committee nga subay sa ilang nasabtan ug obserbasyon,aspetong moral lamang nga dunay kalambigitan si Moreno kay wala niini sumpu-a ang COWD-COBI contract.
Una nang gipamugos sa city hall nga disbintaha sa katawhan ang kontrata kay gihimo nila nga basehan ang otomatikong usbaw sa bayrunon sa tubig kada-labay sa tulo ka tuig.
Samtang gitambagan ni Moreno ang city hall nga dili lisud-lisuron apan angay tabangan makabayad ang COWD sa nagkadako nga contract payables sa COBI.
Kini ang tubag ni Moreno kabahin sa pagduot kaniya sa city hall kon nganong nagka-problema sa bayrunon ang COWD.
Namahayag ang kanhi opisyal nga dili angay ipiton apan hatagan sa patas usab nga proteksyon ang investors kay kabahin sila nagpalig-on sa ekonomiya sa dakbayan.
Dugang ni Moreno nga dili na bag-o ang public utility rate adjustments sa matag-dinagko nga kontrata kay miagi kini sa pagsusi sa gobierno sukwahi sa gihimo sa city hall nga paghimong dautan sa imahen sa COBI.
Samtang namugos usab ang panig ni fact finding sub-committee chairman Kag. James Judith nga gihimo lang ni Uy ang ilang obligasyong moral kabahin sa isyu sa panubig sa dakbayan.
Kini ang depensa ni Judith sa akusasyon ni Moreno nga politika ug pagguba kaniya ang nag-unang tuyo sa city govt gamit ang isyu sa COWD-COBI contract.
Namahayag si Judith nga naglikay lamang usab sila nga sumbalikan sa katawhan nga walay gibuhat batok sa upat ka bahad sa COBI nga putla’g tubig ang dakbayan kon dili makabayad sa sobra 400 milyones pesos nga payables ang COWD.
