CAGAYAN DE ORO CITY – Magtagbo ang kadagkuan sa Cagayan de Oro Water District o COWD ingon man ang Cagayan de Oro Water Bulk Incorporated o COBI ugmang adlawa.
Miingon si COWD General Manager Engr. Antonio Young nga resulta kini sa gipangayo nga bayad sa COBI sobra 400 milyones pesos sa gi-suplay nga tubig nga nakahatag alarma sa kagamhanan sa syudad.
Namahayag si Young nga lauman ang pagsang-at sa counter proposals sa duha ka panig aron makabaton sa win-win solution ang maong isyu.
Nasakyan na sa politika ang bulk water contact sa duha ka panig rason nga dunay mga pagbinasulay na sa kanhi ug kasamtangang administrasyon sa syudad.
Samtang wala daw problemaha ni City Mayor Rolando ‘Klarex’ Uy kon tinud-on sa COBI nga dili suplaya’g tubig ang katawhan sa dakbayan.
Kini tungod kay may nakaandam na nga mga lakang ang city govt rason natukod ang task force water distribution batok sa bahad sa COBI.
Namugos si Uy nga dili politika apan interes sa katawhan ang iyang gipanalipdan hinungdang gipa-imbestigar niini sa task force kon kinsay angay manubag sa COWD-COBI contract.
Hisayrang sa miaging Pebrero ning tuiga,gihinagbo pa sa mayor ang COBI officials aron mahilot unta ang maong problema.
