CAGAYAN DE ORO CITY – Ikatag na sa city govt ang ilang mga personahe aron mohatag sa seguridad ug mapasunod ang mga gabayan nga angay buhaton sa mga deboto sa pag-obserbar sa semana santa ning syudad.
Maoy gitumbok ni CDRRMD manager Nick Jabagat ang pag-deploy na sa Incident Management Team members sa pilgrimage sites sa bukid sa Malasag sa Brgy Cugman ug Berhin sa Guadalupe nga napalibutan sa kabarangayan sa Tablon,Agusan ug Balubal ning syudad.
Namahayag si Jabagat nga andam na usab ang laing team nga ikatag sa nagkadaiyang beaches ug resorts alayon sa taliabot pagsugat sa Domingo sa pagkabanhaw.
Samtang gipaniguro usab sa city govt sa El Salvador nga mahatagan sa bastanteng seguridad ang libuang mga deboto nga mobisita sa Divine Mercy Shrine sa Brgy Ulaliman ning semana santa.
Miingon si El Salvador City Mayor Edgar Lignes nga nakahan -ay na ang gabayan nga angay sundon sa pilgrimage visitors epektibo ugmang adlawa.
Gitahasan usab niini ang ilang ubang opisyal nga dunay kanunay’ng koordinasyon sa tigdumala sa Divine Mercy aron paspas matubag kon dunay mga emerhensiya.
Samtang pabiling negatibo pa sa bisan unsa nga dili maayong hitabo ang tibuok rehiyon nga hugot gibantayan sa kapolisan ug kasundaluhan samtang gitamod ang mga mahal nga adlaw.
Kompirmasyon kini ni Police Regional Office 10 spokesperson Police Maj Joann Navarro alayon sa ilang pag-isa sa full alert status sa rehiyon sulod ning semanaha.
Siya miingon nga gawas niini,wala giubos sa Camp Alagar ang ka-alerto sa ilang lower units batok sa mga posibleng sabotahe nga himoon sa mga kontrata sa gobierno.
