CAGAYAN DE ORO CITY – Gihulat na ni City Mayor Rolando ‘Klarex’ Uy ang rekomendasyon sa iyang gitukod nga task force diin mihimo’g imbestigasyon sa giingong kahiwian tali sa kontrata sa panubig nga gisudlan sa Cagayan de Oro Water District o COWD ug Cagayan de Oro Bulk Water Incporporated o COBI ning syudad.
Kini human gisulti sa mayor nga hayan dunay himoon nga special session ang konseho unya sa hapon diin sentro ang unod sa task force investigation sa COWD-COBI contract.
Nanglugwa ang impormasyon nga kanselasyon sa kontrata ang rekomendasyon sa konseho ngadto sa mayor kabahin sa panubig nga gi-suplay sa COBI ngadto sa katawhan.
Samtang bisan kon tibuok syudad ang wad-an sa suplay sa tubig,dili lang daw mabalaka ang katawhan.
Kini ang pasigarbo ni Uy nunot sa nakaung-ong nga paghunong suplay sa tubig sa COBI sa Abril 12 ning tuiga.
Namahayag ang mayor nga nakuha na niya ang pasalig sa ubang water suppliers aron tubagon ang panginahanglan sa tubig kon ihinayon sa COBI ang ilang bahad sa COWD.
Una nang namahayag si COWD General Manager Engr Antonio Young nga dako ang tsansa nga walay putol nga mahitabo sa tubig kay subli sila magtagbo sa COBI officials sa mismong petsa 12 sa Abril.
