CAGAYAN DE ORO CITY – Gikompirmar sa konseho nga tipik sa unod sa ilang rekomendasyon kang City Mayor Rolando ‘Klarex’ Uy nga wad-a’g bili ang kontrata sa panubig tali Cagayan de Oro Water District ug Metro Pacific Water pinaagi sa naporma nga Cagayan de Oro Bulk Water Incoporated o COBI.
Namahayag si task force fact finding sub-committee chairman Kag. James Judith nga tipik sa basehan sa ilang sa rekomendasyon ang probisyon sa kontrata nga dunay otomatikong usbaw-bayrunon sa tubig kada-tulo ka tuig.
Alang sa komitiba ni Judith nga disbintaha kini sa interes sa mga konsumante sa katawhan sa dakbayan.
Gihulat na lang go signal ni Mayor Klarex kon unsay sunod nga buhaton sa task force ilabina nga kutob petsa 12 sa Abril na lang ang gitagal sa COBI ayha putlon ang tubig sa COWD kon dili kabayad sa ilang utang.
Samtang walay epektong-legal ang ang laraw nga contract cancellation.
Mismo si task force co-chairman Kag. Edgar Cabanlas ang nasayod nga wala sa gahom sa konseho nga wad-an sa bili ang bulk-water contract tali sa duha ka panig.
Hinoon,iduso nila ang kopya sa ilang findings sa ubang mga buhatan sa gobierno ug sila na ang mag-igo kon may ipasaka sila nga kaso batok sa mga tawo nga nakitang dunay tulubagon sa maong isyu.
Sa pikas bahin,gusto ni City Vice Mayor Jocelyn ‘Bebot’ Rodriguez nga moagi na sa pag-rebyo sa konseho ang sudlan nga dinagkong mga kontrata sa mga negosyante dinhi sa syudad.
Kini sa tuyo nga dili na mahisama sa COWD-COBI water contract nga naabtan pa sa dugay’ng katuigan ayha nasusi nga dunay depektoso nga bahin sa mga probisyon sa kontrata.
Namahayag ang bise-mayor nga dili na gusto niini nga mabutang sa dakong alanganin ang interes sa katawhan sama sa gihimong pagbahad sa COBI nga kon dili kabayad ang COWD,ilang putlan sa panubig.
Nunot niini,nahuna-hunaan usab ang suhestiyon nga motukod na sa kaugalingong water treatment facility ang city govt sa dili madugay.
Kini ang gisugyot ni kang Uy aron may kaugalingon na nga kapas ang city govt pag-suplay sa tubig sa mismong katawhan niini.
Siya miingon nga naumol kini nga ideya nunot sa pagbutho usab sa suliran tali sa COWD ug COBI diin naglatugi ang duruha nunot sa isyu sa minilyong bayrunon.
Hisayrang igo ra gapalit sa Rio Verde ang COBI ug gisuplay ra usab niini sa mga konsumante sa COWD.
