CAGAYAN DE ORO CITY – Nagsibog sa laing higayon ang pag-diskonektar sa tubig-suplay gikan sa Cagayan de Oro Bulk Water Incorporated o COBI ngadto sa mga konsumante sa Cagayan de Oro Water District o COWD.
Kini resulta sa panagtagbo sa COWD-COBI officials nga gidumala sa kadagkuan sa Local Water and Utilities Administration o LWUA mismo sa adlaw nga gisitar nga putlan na unta’g tubig ang dakbayan.
Namahayag si COWD General Manager Engr Antonio Young nga inisyal nga milugway ang COBI sa dugang Mayo 12 ning tuiga ayha mopatuman sa ilang hukom sa panubig sa dakbayan.
Samtang gikalipay sa COBI officials nga giila na sa COWD ang ilang obligasyong minilyon isip bayrunon sa na-deliver nga suplay sa tubig sa dakbayan.
Kini ang kabahin sa rason kon nganong misanong ang COBI sa hangyo sa LWUA nga dili una ihinayon ang pag-diskonektar sa panubig sa syudad kagahapong adlawa.
Miingon si COBI senior legal counsel Atty. Roberto Rodrigo nga angayang pangitaan na’g sulbad sa COWD ang pagbayad sa utang kaysa moabot sa punto nga maputlan sa tubi ang syudad.
