CAGAYAN DE ORO CITY – Gitawag nga ‘imagine emergency’ ni kanhi City Mayor Oscar Moreno ang mando ni City Mayor Rolando ‘Klarex’ Uy nga ipaubos sa taas nga alerto ang kahimtang sa panubig sa syudad.
Kini human gilugwa ni Uy ang state of emergency declaration nga giuyunan usab sa konseho epekto sa pagputol sa tubig-supply sa Cagayan de Oro Bulk Water Incorporated o COBI ngadto sa Cagayan de Oro Water District o COWD.
Miingon si Moreno nga gihinadlok lang sa city hall ang katawhan taliwala nga igo lang naningil sa utang ang COBI ngadto sa city water district.
Namahayag si Moreno nga angayang ihunong sa grupo sa mayor ang paghinadlok sa katawhan kay dili epektibo ang propaganda aron ipatoo sa publiko nga tungod kaniya nasalbar ang panubig sa syudad.
Naghatag lang daw sa dakong kaulaw ang gihimo sa administration.
Una usab niini,gitawag ni Kag. Edgar Cabanlas nga dakong hinakog ang gihimo sa COBI nga pagputol sa tubig rason nga gibantayan sa mga sundalo’g pulis ang Rio Verde aron likayan ang mga sabotahe.
Kini ang rason nga gisuportahan sa konseho ang gihapangayo nga state of emergency declaration ni Uy nunot sa maong isyu.
