CAGAYAN DE ORO CITY – Gusto sa kompanyang Metro Pacific Water nga ensakto ug dili sila masayop sa ilang itaral sa husgado pag-abot sa tukmang panahon.
Kini human kompirmaha ni MetroPac Water senior legal counsel Atty. Roberto Rodrigo nga gitun-an na sa ilang legal team ang tanang puwede nila mahimo sa dili maayo nga kasinatian sa pag-negosyo’g tubig dinhi sa syudad.
Gihimo ni Rodrigo ang pahayag nunot sa padayong pagdumili pagbayad sa ilang gisingil nga bayrunon sa Cagayan de Oro Water District nga bayronon kay managlahi ang water rate computation nga gipanggamit niini.
Siya miingon nga kini ang unang higayon nga nakasugat sila’g suliran sa water business sa MetroPac ug dinhi pa sa Cagayan de Oro City.
Gidumdom usab niini nga daghang higayon nga nakigtagbo sila sa COWD officials apan ilang nasabtan nga dili seryoso nga sulbaron ang giatubang nga mga obligasyon.
Hinoon,andam pa gihapon sila sa re-negotiation sa COWD kon gikinahanglan tungod sa kasamtangang 30 ka tuig nga kontrata sa panubig.
Una nang namugos ang COWD board of directors nga wala sila’y standing payables sukwahi sa gipamugos sa COBI nga 479 milyones pesos.
Dumduman nga namahayag na si City Mayor Rolando ‘Klarex’ Uy nga kon mahimo wad-on sa kontrata ang probisyon nga kada-tulo ka tuig otomatikong mag-water rate increase kay dako kining disbintaha sa katawhan sa dakbayan.
