CAGAYAN DE ORO CITY – Mas haom nga mga taga-city hall ang madeklara nga persona non grata kaysa ang kompanyang MetroPac-COBI ning syudad.
Kini ang pagsaway ni kanhi City Mayor Oscar Moreno sa giingong paglisud-lisod sa grupo ni City Mayor Rolando ‘Klarex’ Uy sa pagpaningil sa Cagayan de Oro Bulk Water Incporporated o COBI sa obligasyon sa Cagayan de Oro Water District o COWD.
Una nang namahayag ang kanhi mayor nga dili imposibli nga mag-atubang sa mga kaso ang administrasyon ni Uy ug konseho kon gustuhon sa COBI nga mangayo’g hustisya sa husgado.
Samtamng wala pa’y tubag si Moreno sa akusasyon sa mga alyado sa ni Uy nga nagsilbing kining abogado sa MetroPac-COBI issue.
Sa pikas bahin, gusto na ni Uy nga masulbad na ang konplikto tali sa COWD ug COBI sa isyu sa bayrunon sa tubig nga na-suplay sa distrito uno ning syudad.
Kini ang hinungdan nga midasig ang mayor nga dunay pundok sa certified of public accountants o CPA nga maoy magpataliwala aron sulbaron ang nagkasungag nga para-matrix formula sa COWD ug COBI.
Namugos usab ang mayor nga wala siya’y dugang interes nga idugay ang state of emergency nga gipatuman tungod sa isyu nga putlan sa COBI sa tubig ang katawhan sa dakbayan.
Sa miaging special session sa konseho, gipasar ang resolusyon diin nagtumong i-padeklara nga persona non grata ang kompanyang Metro Pacific Water ug COBI gumikan sa water cut off order sa miaging Mayo 1.
