CAGAYAN DE ORO CITY – Mi-apelar ang kaparian sa simbahang Katolika sa hiniusang mga pag-ampo alang sa kaluwasan nga dayon sa kalag ni Pope Francis o si Jorge Mario Bergoglio sa iyang tinood nga pangalan.
Kini taliwala sa gibilin nga legasiya ni Santo Papa Francisco sa simbahan ngadto binilyong mga sumusunod sa pagtuluang Katoliko.
Kini ang mensahe ni Reverend Father Arnel Bahian,on study leave didto sa Roma nga kabahin sa nangadlawon paglinya aron masud-on sa katapusang higayon si Pope Francis ayha gilubong sa Basilica of Santa Maria Maggiore sa Roma,Italya kagahapong adlawa.
Miingon si Padre Arnel nga angayang iampo usab sa katawhan ang college of cardinals diin usa kanila ang pili-on aron ipadayon ang naputol nga trabaho ni Papa Francisco.
Hisayrang sa gihalad nga misa sa mga cardinal sa hawanan sa Saint Peter’s Square, gisaksihan kini sa daghang world leaders,tag-as nga mga opisyal gikan sa nagkadaiyang mga relihiyon ug mismong katawhan nga nawili kang Pope Francis nga nagsilbing ika-266 nga santo papa sa simbahang Katolika.
