Walay sagol pamulitika ang pagmando ni Presidente Ferdinand Marcos Jr., nga imbestigaran ang nagpatong-patong nga reklamo sa mga konsumante batok PrimeWater nga gipanag-iya sa pamilya Villar.
Todo depensa si Malacañang Press Undersecretary Claire Castro sa isyu kung nganong na “timing” ang imbestigasyon human milugwa ang campaign advertisement ni Camille Villar nga gi-endorso ni Vice President Sara Duterte.
Si Villar, kinsa pabiling giila nga miyembro sa Alyansa Slate, padayong tak-om sa isyu.
Apan una nang nagpadayag si VP Duterte nga pamulitika ang hinungdan kung nganong napagawas ang maong isyu.
Si Atty Castro, sa iyang bahin, mipadayag nga kinahanglan masayran sa publiko ang rason kung nganong migula ang kontrobersiya sa daut nga sistema sa panubig nga gipadagan sa pamilya Villar.
Hinoon, mitin-aw si Castro nga dili kini maka-apekto sa kandidatura ni Congressman Villar kay performance man sa iyang pagserbisyo sa gobyerno ang sukdanan sa iyang pagpili ug dili negosyo sa iyang ginikanan.
Hisayran nga ang PrimeWater Infrastructure Corporation kasamtangang gimbestigahan sa Local Water Utilities Administration (LWUA) tungod sa daghang reklamo sa mga konsumidor sa Bulacan, Cavite, Laguna, Bohol, ug Pangasinan.
Ang mga nag-unang isyu nga giatubang sa PrimeWater naglakip sa pagkaputol sa suplay sa tubig sa daghang lugar, taas nga bayad sa serbisyo nga wala makatugma sa kalidad sa tubig ug ang mga kuwestiyonabli nga mga joint venture agreements sa lokal nga water districts nga gikinahanglan susihon ug repasohon.
Gipahayag sa Malacañang nga ang imbestigasyon dili politikal, apan usa ka obligasyon sa gobyerno aron matubag ang mga reklamo sa katawhan.
