CAGAYAN DE ORO CITY – Mataral na sa husgado ang gikaitanpan nga suspected top ranking leader sa Communist Terrorist Group o CTG nga adunay upat ka kasong kriminal dihang naukoy kini sa kapolisan ug militar nga nagtagu-tago sa Habitat,Phase 2,Brgy Indahag ning syudad.
Miila ang 6th ‘Kampilan’ Infantry Division sa dinakpan nga si Edward Flores nga nagkupot sa alyases nga si Ramon,Rafa,Ruby ug Cess nga nagsilbing kalihim sa Far South Mindanao Region sa CTG.
Naglihok usab si Flores isip kalihim sa regional urban committee nga ubos sa Dismantled Guerilla Front TALA ug tigpamaba sa CPP-NPA-NDF nga dugay’ng panahon nga nagtinguha paglumpag sa demokrasyang sistema sa Pilipinas.
Gidakop pinaagi sa arrest warrants nga bitbit sa mga otoridad si Flores tungod sa iyang duha ka kasong murder,kasupakan sa anti-terrorism act of 2020 ingon man multiple attempted homicide nga nakasang-at sa mga korte sa Sultan Kudarat,South Cotabato ug Tagum City.
Hisayrang pagkasignit sa akusado sulod sa iyang gisak-ang balay,nabawian kini sa grenada,kalibre 45 ug smartphone.
