Otomatik nga masipa sa trabaho ang tubag ni Presidente Ferdinand Marcos Jr kalabot sa iyang bag-ong BBM Podcast: Episode 2.
Unod kini sa iyang mensahe nga bisan higala, kaila o tag-as ang posisyon sa usa ka trabahante sa gobyerno, insigida kining malangkat sa puwesto kung masuta nga luya ang track record ug performance sa trabaho.
Gipakasama niya kini sa balaod sa militar nga insigida e-relieve ang mga non-performing officers.
Ang teaser sa podcast nagpakita sa seryoso nga paningkamot sa administrasyon nga masiguro ang epektibong serbisyo publiko, ilabi na human sa 2025 midterm elections, diin gilauman sa katawhan ang resulta ug aksyon, dili lang pulitika.
Si Marcos Jr. nag-ingon nga ang tanang cabinet members anaa sa probationary status, ug ang ilang performance maoy basihan kung sila magapadayon sa ilang posisyon o dili.
Ang Presidential Communications Office (PCO) mipahibalo nga ang kompletong episode sa podcast ipagawas karong hapon sa opisyal nga social media pages sa gobyerno.
Ang maong podcast naghatag og mas lawom nga pagpasabot sa bag-ong polisiya sa administrasyon, ilabi na sa courtesy resignations nga gipangayo ni Marcos Jr. sa tanang cabinet members.
