Dili kasulod sa City Council si ABC President ug Gusa Barangay Kapitan Marlo Tabac, taliwala nga namumpa na kini niadtong Hunyo 30, 2025, isip presidente sa Liga.
Apan sa pakighinabi sa Bombo Radyo, mismo si Tabac ang mikompirmar nga dili siya makasulod sa unang sesyon sa konseho ning syudad sa Lunes, Hulyo 7 kay wala pa siyay nadawat nga kompirmasyon sa gikan sa nasyonal nga liga.
Miingon si Tabac nga kini nalang ang iyang kulang nga dokumento aron siya mupungko sa pagkapresidente sa liga sa syudad.
Una niini, namahayag si National Liga President Maria Katrina Jessica Dy, wala pa’y legal nga basehan aron ideklarar nga bakante ang posisyon ni Tabac isip VP, ug ang “loss of trust and confidence” dili rason sa pagpahawa sa usa ka opisyal base sa 2025 constitution ug bylaws sa Liga.
Wala sab dokumento nga nagpakita nga si Tabac mi-resign o gi-disqualify, ug wala siyay kaso nga nagresulta sa iyang pagtangtang. Bisan pa sa iyang panumpa isip presidente, nagpadayon ang kontrobersiya, ilabi na human 64 ka barangay kapitanes ang mipirma sa petisyon batok kaniya tungod sa “loss of trust and confidence”.
Si Tabac miangkon nga ilegal ang pagpahawa kaniya ug nagplano sa legal nga aksyon batok sa mga pumirma sa petisyon.
