CAGAYAN DE ORO CITY – Gikakurat apan gikalipay ni 2021 Ms Inter-continental Cindy Obeñita ang pagtudlo kaniya ni Misamis Oriental Governor Juliette Uy nga panguluhan ang provincial tourism office sa Misamis Oriental.
Kini tipik sa mga kabag-uhan sa Uy administration sa kapitolyo-probinsyal diin natudlo si Cindy kinsa kanhi supervising tourism operations officer sa panahon nila ni kanhi governors Bambi Emano nga kongresista na sa distrikto sa lalawigan ug Peter Unabia.
Siya miingon nga hangtod sa pagkutlo ning balita, wala pa mokunsad kaniya ang pagsalig nga gihatag kaniya sa gobernadora.
Dumduman nga namulong si Uy nga kabahin sa iyang prioridad ang pagpalig-on sa turismo sa probinsyan rason nga ipalambo pa ang paglusad sa tinuig nga Kuyamis Festival nga nahimuan na’g balaod sa pagpangusog ni Emano.
Si Cindy ang mihulip sa con-current capacity function ni Maryden ‘Lilay’ Ocot kinsa gipa-pokus na sa pagsilbing ulo sa departmento sa Early Childhood Care Development Office sa kapitolyo-probinsyal.
